இடைநிலை ஆசிரியர் தேர்வு: அடுத்த மாதம் நடக்க வாய்ப்பு

"அரசு அறிவித்துள்ள 2,000 இடைநிலை ஆசிரியர்கள் நியமனம், அடுத்த மாதம் நடக்க வாய்ப்புள்ளது' என, தமிழக தொடக்கக் கல்வித்துறை இயக்குனர் தேவராஜன் தெரிவித்தார். இதுகுறித்து திருச்சியில் அவர் நிருபர்களிடம் கூறியதாவது:

தமிழகத்தில் புதிதாக அறிமுகம் செய்த ஏ.பி.எல்., (செயல்வழிக் கற்றல்) திட்ட கற்பித்தல் அட்டைகளில், சில மாறுதல் செய்யப்பட்டு வழங்கப்பட்டுள்ளது. புதிதாக தேர்ந்தெடுக்கப்பட்டுள்ள இடைநிலை ஆசிரியர்களுக்கு, ஆகஸ்ட் மாதம், இரண்டு வார புத்தாக்கப் பயிற்சி, 10 மையங்களில் அளிக்கப்படுகிறது. மேலும், சிறந்த பள்ளிகளிலும் அவர்கள் பயிற்சி பெற திட்டமிட்டுள்ளது. மாநிலத்தில், மொத்தம் 7,000 நடுநிலைப்பள்ளி உள்ளது. இதில், கடந்தாண்டு 2,200 பள்ளிகளுக்கு, ஐந்து லேப்-டாப் கம்யூட்டர் வழங்கப்பட்டது. நடப்பு கல்வியாண்டில், பள்ளிக்கு மூன்று வீதம், 2,500 நடுநிலைப்பள்ளிகளுக்கு லேப்-டாப் வழங்கும் திட்டம் செயல்பாட்டில் உள்ளது.

அடுத்தாண்டு முதல், நடுநிலைப்பள்ளிகளில் ஒவ்வொரு ஆசிரியரிடமும், ஒரு லேப்-டாப் இருக்கும் சூழ்நிலை உருவாகியுள்ளது. தமிழகத்தில், மேலும் 3,000 பட்டதாரி ஆசிரியர்கள் மற்றும் 2,000 இடைநிலை ஆசிரியர்கள் நியமனம் செய்ய, அரசு அனுமதி அளித்துள்ளது. மாநில சீனியாரிட்டி அடிப்படையில் 2,000 இடைநிலை ஆசிரியர்கள், அடுத்த மாதம் தேர்வு செய்ய வாய்ப்புள்ளது. இவ்வாறு தேவராஜன் கூறினார் - தினமலர்