2010-2011 ஆண்டிற்கான 5818 பட்டதாரி ஆசிரியர்கள் நியமனத்துக்கு பட்டியல் தயார்

சென்னை : அரசுப் பள்ளிகளில் ஏற்பட்டுள்ள காலி இடங்களில் 5818 பட்டதாரி ஆசிரியர்கள் நியமிக்க உள்ளனர். கூடுதல் பணியிடங்களில் தேவைப்படுவோரை நியமிக்க சீனியாரிட்டி பட்டியலை ஆசிரியர் தேர்வு வாரியம் வாங்கியுள்ளது. 

பள்ளிக் கல்வி இயக்ககம், தொடக்க கல்வி இயக்ககத்தில் 2010 & 2011ம் ஆண்டில் ஏற்பட்டுள்ள காலி பணியிடங்களில் முதுநிலை மற்றும் பட்டதாரி ஆசிரியர்கள் நியமிக்கப்படுவார்கள் என்று சட்டமன்றத்தில் அரசு அறிவித்தது. அதன்படி பள்ளிக் கல்வியில் 916 முதுநிலை பட்டதாரிகள், 4052 பட்டதாரி ஆசிரியர்கள், 348 உடற்கல்வி ஆசிரியர்கள், சிறப்பாசிரியர்கள் 68 பேர் நியமிக்கப்படுவார்கள் என தெரிவிக்கப்பட்டது. மேலும் தொடக்க கல்வியில் 1766 பட்டதாரி ஆசிரியர்கள், 1743 இடைநிலை ஆசிரியர்கள் நியமிக்கப்படுவார்கள் என்றும் அறிவிக்கப்பட்டது. இதன்படி பட்டதாரி ஆசிரியர்கள் (4052 மற்றும் 1766) 5818 பேர் தற்போது நியமனம் செய்யப்படுகின்றனர். ஏற்கனவே சான்று சரிபார்ப்பு முடித்து (2009&2010) பணி நியமனம் பெற்றவர்கள் போக மீதம் உள்ள 24000 பேரில் மேற்கண்ட 5818 பேர் தேர்ந்தெடுக்கப்படுவார்கள் என்று தெரிகிறது. இந்நிலையில், பள்ளிக் கல்வி மற்றும் தொடக்க கல்வித் துறையில் எடுத்த கணக்கின்படி கூடுதலாக தேவைப்படும் ஆசிரியர் பணியிடங்களில் நியமனம் செய்ய, அனைத்து மாவட்ட வேலை வாய்ப்பு அலுவலகங்களில் இருந்தும் மாநில பதிவு மூப்பு பட்டியலை ஆசிரியர் தேர்வு வாரியம் கேட்டது.  29.12.2009 வரையிலான பட்டியல் வாரியத்துக்கு அனுப்பி வைக்கப்பட்டுள்ளது. இதில் இயற்பியல், வேதியியல், தாவரவியல், விலங்கியல், ஆங்கிலம், மற்றும் வரலாறு, தமிழ், புவியியல் பாடங்களில் பதிவு செய்துள்ளவர்கள் இடம் பெற்றுள்ளனர். முதற்கட்டமாக, அடுத்த வாரம் 5818 பேருக்கு கவுன்சலிங் நடக்கிறது. அடுத்த கட்டமாக, கூடுதல் ஆசிரியர்களுக்கான கவுன்சலிங் தொடங்கும். இதற்கிடையே, ஆர்எம்எஸ்ஏ திட்டத்தின் கீழ் தரம் உயர்த்தப்படும் பள்ளிகளில் 3000 ஆசிரியர்களை நியமிக்கும் பணிகள் தொடங்க உள்ளன.